Indunada generala dla Cassa Raiffeisen Val Badia
En vëndres ai 21 d’aurí 2023 él gnü tigní l’indunada generala dla Cassa Raiffeisen Val Badia.
Le presidënt Georg Mutschlechner á podü saludé 509 sozi presënc (lapró 6 deleghes) y ti porté dant i dac plü importanc dl ann 2022.
Sciöche vigni ann él gnü tigní la relaziun dl Consëi d’aministraziun portan dant n per de dac dl'economia locala y globala. Da öna na pert unse na inflaziun dër alta, tla Talia le 10%, che á gaujé n gran aumënt di prisc tl consum. Por contrasté l’inflaziun á les banches zentrales aumenté i fic de referimënt. Dal’atra pert án a vigni moda odü che tla Val Badia florëscel le turism cun 3,13 miliuns de presënzes, y insciö él ince le setur dl frabiché che á na garanzia implü por inciaries de laur. Te Südtirol baiunse praticamënter de na ocupaziun plëna cun n indesc de dejocupaziun sot al 3%.
Le diretur Hubert Obwegs ti á presenté ai sozi n bilanz dla Cassa plü co positif cun n davagn de 5,088 miliuns de euro, che é dl 2,27% plü alt co l’ann denant. Ince i sozi é chersciüs de 33 unités rovan a 2.652, y al é gnü pormez 3 colauradësses nöies. Danter les chestiuns “aministratives” él gnü aprové da aumenté le consëi d’aministraziun da 6 a 7 mëmbri; chiló gnarál pormez na secunda ëra.
Inultima él gnü tigní n pice referat da Elisa Irsara dl Raiffeisenverband Südtirol dal titul “Les comunités energetiches: la poscibilité da sté ite por ti dé na ota al’energia”. Te chësta ocajiun á ciafé lerch la proposta da mëte impé na comunité energetica tla valada.
